ست البيتنصائح مطبخية

نصائح هامة لكل ست في المطبخ

تعالى اسمعي الكلمتين دول يا وزة انتي و هي هينفعوكي اوي

اول ما تقومي من النوم اعدلي سريريك بالمرة لو مش هتغيري الملايات واي حاجة موجودة هتدخل المطبخ خديها معاكي بالمرة

وانتي بتغسلي وشك وقبل ما تتوضئ اغسلي الحوض والمرايا بالمرة خلي دايما ليفة الحوض موجوده جنبه علشان متكسليش تغسليه

حطي فرشة في الشباك بتاع الحمام علشان التراب اللي علي السلك يتنضف في ثواني

اعملي ازازة فيها ديتول وكلور ومعطر ورشي وسبيه شوية وكوبي مياه في ثواني حتلقيه فل..ولا الريحة يا جمال الحمام .

هاتي كيس برسيل جيل وخرميه او دواني وخرمية بسيط وحطيه جوه الكومبينشن هيعطر حلو قوي

اي بواقي صابونة الزقيها في الصابونة التانية ربنا حيحسابنا لو كنا مبذرين وكمان المعيشة بقت غالية وممكن كمان نجمعهم ومياه سخنة يدوبوا ومعطر واعمليهم شاور وورق الصابون حطيه في الدولاب للهدوم اللي شيلنها للصيف مثلا وازايز البرفان اللي خلصت شيلي الغطا وحطيهم في الدولاب

اول ما تدخلي المطبخ وعندك شغل فيه قولي لا حول ولا قوة الا بالله ربنا هييسر بأذن الله وطبعا احتسبي تعبك عند رب العالمين يكون في ميزان حسناتك

احسن حاجة هنستعملها للمطبخ الخل روووعة بجد نحط منه مع الصابون السايل ونغسل بيه الرخامة تعقيم ونضافة ودايما بنغسل بيه الاكل فراخ وطيور ولازم ننقع الفاكهة اللي مش بتتقشر في مياه وخل

للدهون بقي اول باول طبعا احسن مليون مرة كل السراميك اللي جنب البوتاجاز سلك خشن لو سهل بالصابون السايل لو صعب حطي كربونات علي السلكة ورشي خل وادعكي وسبيه شوية وعن تجربة الجاز رووعة بس ابعدي الاكل والتوابل

البوتاجاز كل يوم يتغسل والعيون اول باول لو اتراكم عليها دهون انقعيها في خل وكربونات وملح ليمون ومية سخنه وصابون سايل ولا أروع وهينور البتوجاز

برضة في شباك المطبخ فرشة ليه وازازة فيها جاز ادعكي بالفرشة ورشي جاز وثواني وادعكي بالفرشة هيبقي زي الفل ومفيش دهون

عصجي لحمة دايما بالمرة وقسميها في اكياس بتوفر في الوقت ولما تحتاجيها ابقي ابشري جزر وفلفل هتزود غذا وهنوفر كمان

شيلي وش اللبن في علب في الفريز واعملي احلي سمنة بلدي ومش هتتقطع من بيتك

جهزي خلطة البانية وشيليها في الفريزر

اعملي كفتة وبرجر وشيليهم الفريزر

للبرجر زودي فول صويا لو عندك بنات علشان غلط علي الصبيان

لو عندك صبيان زودي شوفان وبيضة هيديكي كمية اكبر

التوابل اللي بتستعملها علي طول خليها في دولاب المطبخ التوابل اللي مش كل يوم بنستخدمها حطيها في علب وشيليها في التلاجة هتعيش معاكي ومش هترمي حاجة ابدا

اي بقوليات عندك شيليها في درج التلاجة عمرها ما تسوس حتي الدقيق بتاع الطبخ

هنوفر ازاي بقي في مسحوق الاتوماتيك انا بستعمل اقل مسحوق في السوق وبعمل ايه بخلط معاه مسحوق عادي اه و بجيب تايد واحط المعيار عادي واحط معه في درج الغسالة شوية اريال عادي متخفيش مش هتبوظ انا طول عمري بعمل كدا الفرق بين المسحوق العادي والاتوماتيك الرغوة وانا حطيت اتوماتيك هيلغي الرغوة بتاعت العادي وحيوفر حلو قوي معاكي وحينضف وحتدعيلي

دايما اي طبخة فيها طماطم وبصل بدل ما اشغل الكبة للبصل والخلاط للطماطم بضربهم مع بعض في الخلاط ضرب خشن وبوفر في الوقت

اي بواقي اكل شيليهم في التلاجة او الفريزر وطلعيهم مرة واحدة نقضي بيهم

اعملي علبة في الفريزر اسمها علبة البواقي ابقي شيليها فيها معلقتين لحمة معصجة كام واحدة سجق اي بواقي بسطرمة اي بواقي جبنة وابقي اعملي بيهم بيتزا او فطير شرقي مش هتحسي بيهم او مكرونة بيتزا كلها وصفات موجودة هنا في الجروب.

اي شوربة زيادة عندك شليها وابقي اعملي بيها مكرونة شوربة او زودي بيها اللبن للبشاميل او زودي بيها اللبن للرز المعمر او اعملي بيها شوربة خضار او اعملي بيها عدس اصفر .أو ملوخية.

مش هنقلي خالص هنوفر الزيت والمجهود واهم حاجة صحتنا طريقة البطاطس المقليه في الفرن بمعلقتين زيت والبدنجان كمان اللي كان بيخلص الزيت وكمان السمك البلطي والمكاريل كلهم عملتهم في الفرن

تنضيف السجاد لو عندك كسوة هتحافظ علي السجاد جدا لو مش عندك اي قماشة واكس السجاد هيحافظ عليه

بالنسبة لو فيه بيبي البامبرز دلوقتي في انواع كتير موفرة ومتخليش البيبي بيه لسن كبير.

لو عندك بيبي اعملي اكله طازة واوفر وبلاش سيريلاك واكل معلب من الصيدليه

لو مصروفك بالشهر شيلي الاساسيات الاول والباقي اكل وشرب علي قدنا وقد مستوانا مش معني كدا مش هناكل ولا هناكل اكل مفيهوش غذا وعندنا اطفال جسمهم بيتبني لا ربنا اسمه العدل ومظلمش حد زي ما عمل للغني عمل للفقير كل حاجة وكلنا فقراء الي الله هنختار اكلات مغذية ونعمل اكلة حلوة في اول الاسبوع

بالنسبة لمصروف الاسبوع انا بحسبها بالاسبوع

قسمي مصروفك بالاسبوع هتتحكمي فيه اكتر من مصروف الشهر

لو عندك عزومة اختاري اكلات تشيل بعض في الوقت والجهد والتكلفة

بالنسبة للشاي لو بتستهلكي شاي كتير قوي هاتي ربع كيلو

شاي ليبتون للشاي السادة مثلا وهاتي اي نوع اقل للشاي بلبن هيوفر معاكي وممكن لو كتير برضه اخلطي الشاي الليبتون مع الشاي العادي هيوفر اكتر معاكي

عايزة اجيب اي حاجة استحالة اجيب قسط خراب بيوت اصبر شوية واحوش او جمعيه واجيب اللي ناقص عندي وكل حاجة واحدة واحدة هنجيب كل حاجة ومش هنحمل علي نفسنا.

رايحة فين أنتي وهي شيفاكو 👀👀

المصدر: فيس بوك

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى